معلومات قانونية
أخر الأخبار

المهندس محمد سعيد يوجه 7 نصائح مهمة للعاملين

✍️⁩ م/محمد_سعيد ٧ حاجات مهميين جدااا لكل اللي في مجال الاتصالات 👇
ياريت نتفق مع بعض علي شويه حاجات هتصلح مجال الاتصالات اللي كلنا بنحبه لكن للاسف فيه عيوب كتير جاري تصليحها باذن الله

اولا لما ينزل اعلان سفر اسال ناس كتير علي المرتب واتاكد من الشركه وخد بيانات صاحبها و اسال علي كل التفاصيل واحسب كويس هتقدر توفر كام ومتحسبش المرتب بالمصري لانك مش هتصرف بالمصري ومتقبلش بالارقام القليله علشان نقدر نرجع قيمه المهندس والفني تاني ذي زمان
………..

ثانيا مفيش مهندس ولا فني فريش يقبل بمرتب اقل من ٢٥٠٠ جنيه ثابت غير البدلات تحت اي ظرف من الظروف ( ده لو فريش وميعرفش اي حاجه ) مع العلم أن أقسم بالله حتي الرقم ده قليل جدا بس هنيجي علي نفسنا علشان نتعلم وطبعا الخبره يتقدر بمرتب محترم
………..

ثالثاً لو انت فريش واشتغلت بمرتب قليل جدا اللي هو ٢٥٠٠ جنيه غير البدلات ده يكون لمده أقصاها ٣ شهور وبعدها يتعملك evaluation وتقييم لشغلك وخبرتك وهل استفدت ولا لا ولو التقييم كويس مرتبك يزيد ذياده محترمه لا تقل عن ١٠٠٠ جنيه ونتيجه التقييم اسال فيها ناس تانيه . يعني مثلا لو مديرك قالك انت متستحقش تزيد لو انت شايف انه ظالمك حكم حد تاني وليكن انا مثلا كلمني وانا والله هقولك بكل صراحه رأيي
………..

رابعا يرجي تجاهل اي اعلان بدون توضيح رينج مرتبات . حرام عليك تروح انترفيو وتدب مشوار وفي الاخر تلاقيه بيقولك مرتب يحرق الدم . لازم تعرف رينج المرتبات كام قبل ماتروح ومفيش حاجه اسمها تعالي خاص لا الكلام يكون في العام وقدام الناس كلها .
………..

خامساً بالله عليكم ماتقبلوا مرتبات قليله كلامي للفريش والخبره لحد سنه . قسما بالله بقا سمعه المهندس والفني المصري وحشه بسبب سوء الأحوال والمرتبات بقت في النازل . والله الشغل كتير في المجال والشركات مش ملاحقه
اتاكد أن انت اهم حاجه في المشروع . انت اللي بتتفشخ في السايت في الشمس وبتطلع البرج وبتشيل علي قلبك وانت أحق حد انك تعيش عيشه اادميه
………..

سادسا اوعي تتخدع بالوعود في الانترفيو والكلام والمرهمه . انت مش هتاكل عيالك كلام ولا هتشتريلهم لبس وتعلمهم بالكلام الحلو . انت عايز فلوس عايز تعيش حياه كريمه . ياما ناس كتير استنوا في شغلهم بسبب وعود وكلام لحد ماوصلوا لمرحله انهم اتزرعوا في المكان وبقا صعب يسيبوه
……….

سابعا خد الكلمه دي مني ومتنساهاش ( احنا بنشتغل علشان حاجتين الفلوس أو الخبره ) لو لقيت نفسك ولا بتاخد فلوس حلوه ولا بتاخد خبره يبقه ده جرس انذار بيقولك امشي فوراااا من الشركه
……….

يعلم ربنا اني مش عايز حاجه من الكلام ده غير وجه الله تعالى . ربنا يوفقكم اي حد محتاج سؤال أو شغل أو داتا يذاكر أو كورس ومعندووش مقدره ماديه يكلمني فورا
ربنا يوفقكم⁦❤️

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق